مۇنبەر خەۋەر تېرمىنالى مەخسۇس سەھىپە دېھقانلار تورى يانفون گېزىتى ئۈندىدار سالونى
    تەرمىلەر

    قىزنىڭ تەشەككۈرى

    ئامانگۈل2015-08-24 17:20:25شىنجاڭ گېزىتى

    (ھېكايە)

    كېۋىن خوگىس 【ئامېرىكا】

        بىز بىر ئائىلىدىكى تۆت جان دېڭىز ساھىلىغا بېرىپ ئويناپ كېلىدىغان بولدۇق. خوتۇنۇم لازىمەتلىكلەرنى تەييار قىلدى.

       بىز دېڭىز ساھىلىغا كېلىپ ئۇزاق ئۆتمەي چوڭ قىزىم كېلىنا ماڭا:

       ـ دادا، بىللە ئايلىنىپ كېلەيلىمۇ؟-دېدى.

       ـ ئەلۋەتتە بولىدۇ، -دېدىم مەن پەرۋاسىزلا، ئاپاڭ بىلەن سىڭلىڭنىمۇ چاقىرىۋالايلى.

       ـ ياق، ئىككىمىزلا ئايلىنايلى، ئۆتۈنۈپ قالاي،- دېدى كېلىنا ماڭا يالۋۇرۇپ .

       كېلىنا قورۇق باسقان يىرىك قولۇمنى تۇتتى، بىز بىللە ماڭدۇق. بىر پەس سۈكۈتتىن كېيىن، ئۇ:

       ـ دادا، سەن سۆزۈمنى ئاڭلاپلا بەر، بۆلۈۋەتمە، بولامدۇ؟- دېدى.

       ـ بولىدۇ.

       ـ سەن بىلەن يالغۇز ئايلىنىپ كېلىشىمدىكى مەقسىتىم، مۇشۇنداق تۇرمۇشقا ئېرىشكىنىم ئۈچۈن ساڭا تەشەككۈر ئېيتىش ئۈچۈن.

       ئۇنىڭ بۇ سۆزىنى ئاڭلاش بىلەن تەڭ يۈرىكىم ‹‹قارت›› قىلىپ قالدى. ئېغىز ئاچماقچى بولدۇم – يۇ، ھېلىلا ئۇنىڭ سۆزىنى بۆلمەسلىككە ۋەدە قىلغىنىم ئۈچۈن،لام – جىم دېمەي تۇردۇم.

       ـ دادا، ناۋادا ئۆلۈپ كەتسەم، بەختلىك ياشىۋالغىنىم ئۈچۈن ئارمىنىم يوق ئىكەنلىكىنى بىلىپ قالساڭكەن دەيمەن. بۇنداق دېسەم باشقىچە ئويلاپ قالما، مەن سېنى شۇ قەدەر ياخش كۆرىمەن. سەن بىر ئېسىل دادا، ۋاقتىڭ بولسىلا بىزنى تاغمۇتاغ – باغمۇباغ ئايلاندۇردۇڭ، ئاپارمىغان يېرىڭ قالمىدى. ساڭا دېسەم، نۇرغۇن دوستلىرىم ئاتا – ئانىلىرى ئۈچۈن، پۇل ئۈچۈن، كەلگۈسى تۇرمۇشى ئۈچۈن ئەندىشە قىلىدۇ. بىراق، مېنىڭ ئەنسىرەيدىغىنىم پەقەتلا بالىلارغا خاس ئىشلار. شۇڭا ناۋادا ياخشى كۈننىڭ يامىنى بولۇپ قالسا، مېنىڭ بۈگۈنكى تۇرمۇشۇم ۋە سەندەك ياخشى دادامنىڭ بولغانلىقىدىن چەكسىز مىننەتدار ئىكەنلىكىمنى باشقىلار بىلىپ قالسىكەن، دەيمەن. شۇڭا ساڭا رەھمەت ئېيتىۋالغۇم كەلدى.

       ئۇ ۋارقىراپ كۈلگىنىچە يۈگۈرۈپ كېتىپ قالدى.

       مەن ھاياجىنىمنى تەستە بېسىپ، ئىچىمدە پىچىرلاپ تۇرۇپ ياخشى تىلەكلەرنى تىلىدىم. مەن يۈگۈرۈشكە تەمشەلدىم – يۇ، ئەمما پۇتۇمنى كۆتۈرەلمىدىم. ئۇنىڭغا يېتىشىۋېلىشىم بەسى مۈشكۈل، چۈنكى كۆزلىرىمدە لىغىرلاپ تۇرغان ياش تۇمان كەبى ئالدىمنى توسۇۋالغانىدى.

    ئادىل غوجالىم تەرجىمىسى 