مۇنبەر خەۋەر تېرمىنالى مەخسۇس سەھىپە دېھقانلار تورى يانفون گېزىتى ئۈندىدار سالونى
    ساغلاملىق بىلىملىرى

    يۈرەكنى ئاسراشنىڭ ئەڭ ياخشى چارىسى ۋاقتىدا غىزالىنىش

    ئامانگۈل2017-03-13 16:16:17شىنجاڭ گېزىتى

     يېقىندا ئامېرىكا يۈرەك كېسەللىكلىرى بىرلەشمىسى (AHA) بايانات ئېلان قىلىپ، تاماقنىڭ تۈرلىرىدىن باشقا، ئۈچ ۋاقلىق تاماقنىڭ ئۆز ۋاقتىدا بولۇش – بولماسلىقى يۈرەك قان تومۇر كېسەللىكلىرى ئۈچۈن ئىنتايىن مۇھىم، دەپ كۆرسەتتى. كولومبىيە ئۇنىۋېرسىتېتى ئوزۇقلۇق تېبابىتى فاكۇلتېتىنىڭ دوتسېنتى پىئېر ستېۋېننىڭ قارىشىچە، ئادەم تېنىدىكى ئەزالارنىڭ ‹‹بىيولوگىيەلىك سائەت››ى بولۇپ، ۋاقتىدا، توغرا ئىستېمال قىلىنغان يېمەكلىكلەرلا يۈرەك ساغلاملىقىغا پايدىلىق بولىدىكەن.

     ئەتىگەن سائەت 7:00دە ناشتا قىلىش. ناشتىدا مۇۋاپىق مىقداردا بۇغداي يارمىسىدىن تەييارلانغان يېمەكلىكلەر بولۇشى كېرەك. سەھەردە قۇياشنىڭ ئاستا – ئاستا كۆتۈرۈلۈشىگە ئەگىشىپ، بەدەنمۇ تەدرىجىي ئويغىنىشقا باشلايدۇ. ئەتىگەن سائەت 7:00ئەتراپىدا ئاشقازان – ئۈچەيلەر تولۇق ئويغىنىپ، ھەزىم قىلىش سىستېمىسىنىڭ خىزمىتى باشلانغان بولىدۇ، شۇڭا مۇشۇ چاغدا ناشتا قىلغاندا، يۇقىرى ئۈنۈمدە ھەزىم قىلغىلى، ئوزۇقلۇقلارنى تولۇق قوبۇل قىلغىلى بولىدۇ. ئادەتتە ناشتىدا مۇۋاپىق مىقداردا بۇغداي يارمىسى ئىستېمال قىلىش تەۋسىيە قىلىنىدۇ، چۈنكى، ئۇنىڭدا بۇغداي ئۈندۈرمىسىدىن باشقا، بۇغداي كېپىكى بولىدۇ، بۇغداي كېپىكىدە كۆپ مىقداردا سېلليۇلوزا (تالا ماددىسى) بولىدۇ. نەزەرىيە جەھەتتىن ئېيتقاندا، بۇغداي يارمىسىدىكى سۇدا ئېرىشچان يېمەكلىك تالالىرىنىڭ بەدەندىكى ناترىينى چىقىرىپ تاشلاپ، قان بېسىمىنى تەڭشەش، يۇقىرى قان بېسىمىنىڭ ئالدىنى ئېلىش رولى بولىدۇ. تەتقىقاتلاردىن مەلۇم بولۇشىچە، مۇۋاپىق مىقداردا بۇغداي يارمىسى ئىستېمال قىلىش ئارقىلىق يۈرەك كېسەللىكلىرىنىڭ قوزغىلىش خەۋپىنى تۆۋەنلىتىشكە بولىدىكەن.

     بۇنىڭدىن باشقا، سۈبھىدىن سەھەرگىچە يۈرەك قان تومۇرلىرىنىڭ توسۇلۇشى ئەڭ يۇقىرى پەللىگە كۆتۈرۈلىدىغان، يۈرەك كېسەللىكلىرى كۆپ قوزغىلىدىغان بولغاچقا، ئەگەر ناشتىدا سۇلۇ يارمىسى ۋە بۇغداي يارمىسى قاتارلىق قان تومۇرلارنى يۇمشىتىشقا ۋە خولېستېرىننىڭ مىقدارىنى تەڭشەشكە پايدىلىق يېمەكلىكلەر ئىستېمال قىلىنسا، قان تومۇرلارنىڭ قېتىشىش ئەھۋالى تېخىمۇ ياخشىلىنىدۇ. ئادەم بەدىنى ئېھتىياجلىق بولغان كۆپ خىل ۋىتامىن، مىنېرال ماددا ۋە تالا ماددىلىرى بۇغداي يارمىسى يېمەكلىكلىرىدە مول بولىدۇ، بەدەندە كېچىچە خوراپ كېمىيىپ كەتكەن ۋىتامىن ۋە مىنېرال ماددىلارنى مۇشۇ خىل ناشتىلىقلار ئارقىلىق تولۇقلاشقا بولىدۇ.

      سائەت10:30ئەتراپىدا ئاز مىقداردا مېۋە – چىۋە قاتارلىق قوشۇمچە يېمەكلىك يېيىش. چۈشتىن بۇرۇن سائەت 10:30ئەتراپىدا ئادەم بەدىنىنىڭ مېتابولىزمى تېزلىشىپ كېتىدىغان بولغاچقا، كىشىلەردە قورساق ئېچىش تۇيغۇسى پەيدا بولىدۇ، بۇ چاغدا ئاز مىقداردا يېمەكلىك يەپ ئېنېرگىيە تولۇقلاش كېرەك، بۇ ئوقۇغۇچىلار ۋە ئەقلىي ئەمگەك قىلىدىغان خادىملارنىڭ دىققىتىنى تېخىمۇ ياخشى مەركەزلەشتۈرۈشىگە ھەم قان بېسىمىنىڭ مۇقىملىقىنى ساقلىشىغا پايدىلىق.

     قوشۇمچە يېمەكلىك يېگەندە ئالما، قارىئۆرۈك ۋە ئاپېلسىن قاتارلىق يېڭى مېۋىلەرنى ئاساس قىلىش كېرەك. ئالمىدىكى پېكتىن (مېۋە يىلىمى) خولېستېرىننىڭ سۈمۈرۈلۈشىنى چەكلەيدۇ، سېلليۇلوزا (تالا ماددىسى) خولېستېرىننى تازىلاشقا ياردەم بېرىدۇ. قارىئۆرۈكتە ئوكسىدلىنىشقا قارشى كۈچلۈك رېئاكتىۋ رېسۋېراترول ۋە قان بېسىمنى تۆۋەنلىتىدىغان، قان تومۇر ياللۇغلىرىنى ئازايتىدىغان ماددا فلاۋونول ناھايىتى مول بولىدۇ، بۇ تەركىبلەر ئاپېلسىندىمۇ مول بولىدۇ. بۇنىڭدىن باشقا، ئاپېلسىندىكى ھېسپېرىدىن يۈرەكنىڭ قان بىلەن تەمىنلىنىشىنى ياخشىلايدۇ.

     چۈشلۈك تاماقنى سائەت 12:30دا يېيىش. تاماقتا سۈپەتلىك ئاقسىللارنى تاللاش كېرەك، چۈش ۋاقتى سائەت 12 دىن كېيىن بەدەننىڭ ئېنېرگىيە ئېھتىياجى ئەڭ كۈچلۈك بولىدۇ، مۇشۇ چاغدا يېيىلگەن تاماق قان بېسىمى ۋە قان مېيىنىڭ تەڭپۇڭلۇقىنى ساقلاشقا پايدىلىق. تەتقىقاتلاردىن مەلۇم بولۇشىچە، چۈشلۈك تاماقتا بەلگىلىك مىقداردا ئاقسىل بولغاندىكى تويۇنۇش تۇيغۇسىنىڭ داۋاملىشىش ۋاقتى تەڭ مىقداردا كاربون سۇ بىرىكمىلىرى ۋە ماي ئىستېمال قىلغاندىكىدىن ئۇزاق بولىدىكەن. شۇنداقلا سۈپەتلىك ئاقسىل قان تومۇرلارنىڭ ئېلاستىكلىقىنى ئاشۇرۇپ، يۈرەك مۇسكۇلىنىڭ كېرىلىش كۈچىنى تۆۋەنلىتىپ، يۈرەكنى قوغداش رولىنى ئوينايدىكەن. ئادەتتە سۈپەتلىك ئاقسىللار پىشلاق (ئىرىمچىك)، قاتتىق پوستلۇق مېۋە، پۇرچاق ئۇيۇتمىسى، تۇننۇس بېلىقى ۋە تۇخۇم قاتارلىقلاردا مول بولىدۇ. دىققەت قىلىشقا ئەرزىيدىغىنى شۇكى، چۈشلۈك تاماقنى ئالدىراپ ھاپىلا – شاپىلا يېمەسلىك، يۇمشاق چايناپ ئاستا يېيىش كېرەك، خىزمەت قىلغاچ تاماق يېيىشكە ھەرگىز بولمايدۇ.

     چۈشتىن كېيىن سائەت 3:30 ئەتراپىدا ئاز مىقداردا يېمەكلىك يەۋېلىش. خىزمەتچىلەرگە نىسبەتەن ئېيتقاندا، چۈشلۈك تاماق بىلەن كەچلىك تاماقنىڭ ئارىلىقى نىسبەتەن ئۇزاقراق بولىدۇ، ئەمما سائەت تۆت ئەتراپىدا بەدەندىكى قان قەنتى تۆۋەنلەشكە باشلايدۇ، بۇ قان تومۇرلارنىڭ ساغلاملىقىغا زىيانلىق، بۇ چاغدا ئاز مىقداردا قېتىق ئىچىۋالسا، قان بېسىمىنى تۇراقلاشتۇرغاندىن باشقا، تەپەككۇرنىڭ ئاستىلاپ كېتىشىدىن ساقلانغىلى، ئىچى تىتىلداپ بىئارام بولۇش ۋە تەشۋىشلىنىش قاتارلىقلارنىڭ ئالدىنى ئالغىلى بولىدۇ. تەتقىقاتلاردىن مەلۇم بولۇشىچە، مۇۋاپىق مىقداردا قېتىق ئىچىش قان بېسىمنى تەڭشەشكە پايدىلىق ئىكەن، قېتىقتىكى پايدىلىق باكتېرىيەلەر سەكتە ۋە يۈرەك مۇسكۇلى تىقىلمىسىنىڭ يۈز بېرىش خەۋپىنى تۆۋەنلىتىدىكەن.

     كەچلىك تاماقنى سائەت 6:30 ئەتراپىدا يېيىش. كەچلىك تاماق ئەڭ ياخشىسى سائەت ئالتە بىلەن يەتتىنىڭ ئارىلىقىدا يېيىلىشى، كۆكتات كۆپرەك بولۇشى كېرەك. كەچلىك تاماق بەك كەچ يېيىلسە، ئۇيقۇ سۈپىتىگە تەسىر يېتىپلا قالماي، ئاشقازان – ئۈچەي ۋە يۈرەكنىڭ يۈكىنى ئاشۇرۇۋېتىدۇ. كەچلىك تاماق سۇيۇق، ياغسىزراق بولۇشى، مور (قېرىنقۇلاق)، شاڭگۇ (پۇراقلىق گۈمبەمەدەك) ۋە كەرەپشە قاتارلىق يېمەكلىك تالالىرىنى كۆپرەك يېيىش ئارقىلىق قان بېسىمى ۋە قاندىكى ماينى كونترول قىلىپ، ئاشقازان – ئۈچەي ھەرىكىتىنى كۈچەيتىش، يېمەكلىك مىقدارىنى كونترول قىلىپ %80 تويۇنۇش بىلەن چەكلىنىش كېرەك. تاماقتىن كېيىن يېرىم سائەت ئەتراپىدا مۇۋاپىق ھەرىكەت قىلىپ، مايلارنىڭ توپلىنىپ قېلىشىدىن ساقلىنىش كېرەك. دوتسېنت پىئېر ستېۋېننىڭ قارىشىچە، كىشىلەرنىڭ ئىككى قېتىملىق تاماق ئارىلىقىدا قوشۇمچە يېمەكلىك يېيىش – يېمەسلىك، قانداق يېمەكلىك يېيىش ئەھۋالى ئوخشاش بولمايدىكەن. شۇڭا، يۈرەك قان تومۇر كېسەللىكلىرى ئاغرىقلىرى بۇ ھەقتە ئەڭ ياخشىسى ئوزۇقلۇق دوختۇرلىرىنىڭ مەسلىھەتىنى ئېلىشى كېرەك ئىكەن.

    ياسىن ئىبراھىم تەرجىمىسى

    ئەسكەرتىش:

    تورىمىزدىكى ئەسەرلەرنىڭ نەشىر ھوقۇقى شىنجاڭ ئۇيغۇر ئاپتونوم رايونلۇق ئاخبارات ئىشخانىسىغا تەۋە، ھەرقايسى تاراتقۇلار كۆچۈرۈپ تارقاتقاندا «تەڭرىتاغ تورى›› دەپ مەنبەنى ئېنىق ئەسكەرتىشى كېرەك، بولمىسا قانۇنىي جاۋابكارلىقى سۈرۈشتە قىلىنىدۇ.